سطيكة ولد دربنا.. كابرين فالدار شي 70 واحد.. سباب داكشي مكانتش التلفزة شحال هادي ..كتوصل 6 لعشية مكاين ميدار..كيبقا باه ولوالدة ديالو شوف فيا ونشوف فيك.. الحصيلة 10 لوالاد.. 5 دراري ..4 دريات..1 مشكوك فأمرو  كيلعب غير معا الدريات

سطيكة خدام نجار فالقريعة.. ولكن خارج ليها من الصغر.. خاد المشعل من عند خوه..خوه دابا رجع مخيبر تقريبا مصطي.. لبراهش للي طالعين كيشدوا فيه.. عاش سبع ولكن شرف القرودة طلعوا عليه

سطيكة مصاحب معا وحدة.. السلاااااامة.. خوتها كلهم شروعا.. خدامة فمخبزة وتبارك الله دايرة كالخابية..وفمها خاسر ولكن مقارنة معا خوتها هي اللي مربية.. عندها ختها ديما محيحا بصون طروا فالدرب.. مسمينها براهيم

كيسالي قبل المغرب  فالقريعة كيصرب من جيهة مقهى الجولان كيكون لابس وغاسل وفيه ريحة الصابون..كيتسناها تخرج  كيديها يقصيو بانيني تاهما يعيشوا.. بحال الناس.. تقريبا..

ولكن داك النهار طالع معاها من دروب البصرة جيهة كمباطة.. كيضحكوا هي كتقول ليه "سير ياشمكار "هوا كيعطيها دقة للظهر.. خوها بارك معا شي أوباش مشافهاش..ولكن واحد من صحاب الحسنات كيقشع ..شافها.. قال لخوها.. "وتاشووووووووف ختك راها معا داك البرهوش" .. باينة ..الجبان ..هرب..خلاها معا خوها كيفرشخ فيها ..خلطها..

جاو خوتها عصروا عليه فراس الدرب فرشحوه تاهوا.. يعرف غير ياكل لعسل دوق أولدي قريص النحل

جاي للدرب كيضرب فراسوا ويغوت "تعداو علياااااا.. وناري.." لحيوان لقا غير باب الدار يبرح فيه.. والدار كيتعشاو..ولكن مزيانة فيه ..داير فيها الولد ديال الدرب.. ايلا دزتي هاز معاك mp3 يلصقك عليه..ونتا نهار كلوا كطلب فمولاه يخليه ليك.. أما شي توني خادوا.. صافي مشا..

تلاقيتوا داك النهار .. عامين مشفتوا.. نسيت.. تحولنا من الدرب.. بدا يبكي عليا "وعلا قوم خويا محمد وعلا بلاد وعلا درب " الله يتبعك لبلا الناس علاش كيخويو لبلاد  علا قبل لكمامر للي بحالك.. بلال كيغني عليك غير نتا

سولتوا علا ديك الهاربة..وهو يخسر وجهو..اصلا هو خيب.. قال " بقيت تاتزوجت بيها ..أو صحا " فخور براسو.. مزوج ليا بروتانا..حتا اقرأ  فيها حاجة مزيانة

ساكنين دابا هما فبين لمدون حدا السويقة فالدرب للي ساكن فيه مضماضو وزعلكة وشي حشرات..هتولدوا سطيكات شكون للي هيخدم فالمخبزات والنجارة..وشكون للي هيفيقنا فالليل.. شكون للي هيشد البوليس..ولادكم.. تزوج بها شي عام ونص يعني 18 شهر.. ولدوا جوج ولاد حاسب ليها المسخوط لوقت.. حاجة ماضيع

هادي قصة سطيكة ونوال.. أما قصة زكرياء الحيوان وديك الصاطة للي لباس عليها ..بوحدها