فالدراجة ديالنا كل كلمة عندها جوج معاني ..لدرجة تقول كلمة كتلقا راسك عميتيها ولا قليل النية للي حداك كيفهمها بالمقلوب وهذا حال هادو دياولنا ..كيطلع واحد فالتلفزة كيقول لك حنا بغينا نخدموا لبلاد وهي مخدومة نيت كبر من عمر المختار وباقي عاصر الزيت قالك باغي يرجع وزير أول ولا يكاجي وخا السيد دوز كل الحقب الجيولوجية.. ديناصور  ومني كيسولوه فالتلفزة كيقول ليهم أن الفيلا للي كيصورو فيها غير مرهونة..زعما قرن من السياسة وباقي مجمع فلوس فيلا وخا بناتو مديرات فشي وزارة ولا علاقة بالدومين ولا ولدو للي فايت 60 عام ودايرو رئيس شباب الحزب.. وخا نكونوا عايشين فعهد سيدنا نوح

ولا واحدة وزيرة وراجلها مدير عام مؤسسة عمومية كبيرة وخو راجلها كاتب دولة وباها كان وزير وزايدها برلمانية ورئيسة جماعة ولا معرفت شنو.. واحد وزير  غادي شاداه نشبة نهار سولوه فالبرلمان على شي حاجة بدا يترعد عليهم يقول ليهم أنا وزير وبابا وزير وباجدي كان وزير.. كن قلب مزيان كن لقا شي عمتو ولا خالتو كاتبة دولة..كاين وزير أخر فنفس سن الأخ للي مذكور قبل برلماني ورئيس جماعةالمقطعين فكازا ..كن غير دار بحال لوزيرة للي رئيسة جماعة كليميني معرفت كيفاش صوتوا عليه ولاد سباتة حتا رجع رئيس ديالهم لا علاقة..اومعرفتش علاش المناصب كيتوزعوا غير عليهم هما.. نفهم أن عائلة قارية كاملة ولكن بالذات يكونواعلاش هما للي شادين المناصب صحاح ..وحد سفيرة فالبرازيل وخوها سفير فالسويد وخوهم قنصل فنيويورك وختهم لاصقة فالقرض العقاري..فهم تصطا..هادو غير شوية للي باين..كل واحد مناسب مع صاحبو ولا مزوج بخت لاخر..كيفاش بنادم يكون عندو طموح يوصل مني يسمع أن قنصلية مبغاوش يحلوها كيتسناو ولد جنرال يترقى باش ياخدها باردة ولا مجلس مدينة كاري ثلاثة طموبيلات ب 280 مليون وخا يشري بيه أباتشي

ربي حرم الظلم على نفسه باش الناس يحرموا الظلم على بعضهم وعمر بن الخطاب رضي الله عنه كان يخاف دابة تعثر فشي قنت ويتحاسب عليها يوم القيامة.. حنا ملايين ديال البشر مشي غير تعثروا ولكن توضروا وحتا واحد مني للي واخدين المسؤولية مخاف الله..ميمكنش تقول لشي حد متهربش سلعة الشمال لحقاش اقتصاد لبلاد يتضرر..أصلا هاد الاقتصاد ياك على ود المواطنين ايوا خليو الناس يستافدوا ولا قولوا ليهم اقتصاد الريع وقسامة للي هيتضرروا مشي البلاد..وكيفاش الواحد ساكن فبيت وحدة مع الذل وباغيه يبقى زوين وميديرش حاجة فراسو وفالعباد وكيصدق خاسر دنيا وأخرة..بعدا نتوما رابحين دنيا أما الأخرة ديال ربي وبالرغم من كل هادشي نعرفوا أن هاد الناس خدمونا وخدموا الوطن