واحد السيد كيزوروه الناس فالصيف  كيكون الموسم ديالو سميتو سيدي والكناس فيه تبارك الله عشرة ميترو..للي شابعين فهامات كيقولوا أنه انجليزي سميتو سير والكنس يمكن مات هنا..زربوا عليه دارو قبة ولكن من شي 8 سنين واحد السيد كان مزلوط دار لباس دقة وحدة صوب قبة وبنا مدرسة وبلاصة الذبيحة وفالسميةدارو الولي الصالح سيدي حزقيل..على حسب معلوماتي سيدي حزقيل كان نبي من أنبياء بني اسرائيل..المهم السيد للي بنا هادشي وكان مزلوط كيقولوا انو ضرب شي كنز ولا معرفت..مفيها عيب كن عطاه للمخزن كانوا هياكلوه غير هما فالصيف كيعمر هنا بالبشر…أغلبية جايين يدبروا على راسهم صحاب النية الناقصة..للي عمرو مدوا ولا دار معرفة مع حولية بحالو كيديرها هنا..باينة غير من الاسهال للي كيجيهم من بعد..تما كيكون القص غلا من نهار الرجا والوداد رايبي ب 5 دراهم بكية ماركيز ب 20 درهم وخا تشريها كاملة..لابد ينوض الصداع كاين للي جاي مع خواتاتو وبنات عمو ولا خالو وهو للي كيكون حاضي..ولكن يعيا ميحضي دازت على عينيه ضبابة..للي محضية راها من عند الله محضية..أخر مرة تعزلت مع واحد الدري نقلبوا فين نعسوا ملقينا غير القبة الدري حط راس نعس.. أنا بقيت فايق وكنشوف بنص عين الجهل..للي معندها مسكينة متاكل وكتلوح الفلوس فالصندوف وتبكي وطلب سيدها يعاونها..ولا للي تحضرات واجية من برا ولكن عقلها باقي ف..وكتلوح فالزرقات والقرفيات..واحد الوقت من بوق الأذان واحد السيد كيعيط على الرجال يدخلوا ياكلوا.. نوضت للي حدايا يمشي ياكل يصدق واكلني ايلا مفاقش..أنا وخا فشكل ولكن مناكلش حاجة مذبوحة لغير الله..الحلوف ناكلوا ولكن داكشي لا..اللهم لحرام ولا الشرك..بقيت مع شي دراري برا..واحد الوقت كلشي كيقلب على مركوب يتلاح لدوارهم..نوامر البورطابلات تبادلوا وللي تحضرو شوية تبادلو ايميلات وللي مشاو بعيد ترندفوا للغذ..ايلا كان هاد السيد ولي ديال بصاح ذنوبوا هيخرجوا فكل قرد من هاد القوم

نسيت..فنفس النهار تضرب الصندوق الفقها بغاو يتصطاو كيقولوا انوا تضرب فالوقت للي كانوا الرجال كياكلوا ووللي ضربوا لفلوس مكالوش مع الرجال والله أعلم..وقيلا عرفتهم

هادي للي كيسميوها حجة وزيارة