داك النهار واحد السيد دايز من الدرب كيعيطوا عليه الدراري..واشيطان واشيطان..جاتني حشومة كنت باغي نشتت لبراهش بشي حجرةولكن قال ليا صاحبي أن هداك الراجل راه سحار..كيمشيو عندو لمراوات وحتى الرجال يصاوب ليهم التبيخة..السحر كاين ومذكور فالقران ولابد شي واحد حصلات ليه ولا سمع ولا حضر لشي واقعة..غير أنا أخر مرة كنت واقف بوحدي بانو ليا جوج مشاش كل واحد منفوخ على صاحبو وكيدويو خفت وبدلت القنت كن كنت مبوق نقول راني كنخرف..وشحال من مرة كنشوف مشة كتركل ولا فكرون مصبوغ طالقينو..شي ناس ربي نزع الرحمة من قلبهم..فيهم للخير يسحروا لشارون ولا بوش..سبحان الله..وطني الحبيب معروف غير بلبلاوي لكحلة وحامدين الله عندي أمل نهار نديرو عقلنا فالمعقول نحتلوا العالم..شحال من واحد هادوك للي تحت الصفر وصحاب جنة جنة لمغرب ياوطنا..كنتلاقا معاهم فالشاط وكيقول ليا منهم شي حد بصاح نتوما معروفين بالسحر مكنلقا منرد كنقول ليه وبصاح نتوما معروفين بالبسالة يالحوالا..هنبعد من الموضوع ونذكر اش قال ليا خويا أن وحدة قالت ليه أن واحد من عريبان سولها علاش كتقولو لينا حوالا قالت ليه لحقاش للي كتشاطي معاكم كتقولوا ليها نصفط لك حوالة

معلينا نرجعو للسحر..كاين أمراض عضوية بحال التوكال الله يستر كيداويه الطبيب  ولكن كاين ظواهر معندهاش تفسير علمي بحال هادوك للي كيدخلوا للفران فبويا عمر ولا للي كيشفروا بالسماوي..ولا للي كيكونوا مسكونين بالجنون..هاد عالم الجن دومين بوحدوا كتلقا وحدة كتقول لك فيا خمسة جنون جوج مسلمين وجوج كفار وواحد شاد لاربيط ..معرفت كيفاش حاسباهم ولا واحد كيدوي بصوت لا علاقة بصوتو

واحد النهار لصقوني شي أخوة ديال التقصير نمشي معاهم يصرعو شي سيد ساكنو جن مجوسي..مكاين ميدار مشيت..واحد من الاخوة كيقرا على السيد وبدا يستفز فالجن ..الجن بدا يهدد بلسان الراجل والله أعلم.. بولحية قال ليه معندك مدير لينا حناعلى طهارة موضيين.. تخلعت غير غمقت عليهم مموضي متاوزة ..جيت غير فضول نصدق راجع لدارنا بجن..ساعة كاملة ونا جامع رجلي وكنقرا فسورة الفلق والناس ومني كيشوف فيا الجن ولا الراجل كنضحك ليه زعما أنا مشي منهم ظريف..الجن مذكور فالقرأن ولكن مسألة يسكن بنادم ولا يكريه معرفت ومباغيش نعرف..كيما قال ليهم واحد السيد لا أومن بالأشباح لكن أخاف منهم..بعدا هادو تقرا عليهم أية الكرسي يغبروا أما شياطين الانس وخا تقرا عليهم البقرة يبقاو العكس يمكن يصححوا ليه الأية ويفسروها