واحد لولد صغير ديما خارج ليا فعودي كنضحك ونلعب معاه ديما..زوين..فمريكان تلعب مع دري وتبوسو يعوكشوك..نرجعوا لهاد الشوية للي دغيا كبر..للي فات 3 سنين مكيبقاش عندي فحكم الصبي.البرائة كتمشي والقوالب كيدخلوا..كنخرج من الدار كيلصقني نبقا معاه يمكن باباه كيخرج بكري مكيشفوش حتا لوالدة ديالو كتقول ليا نتا عزيز عليه كنتهنا غير ايلا كان معاك…تانا كنخاف يصدق الدري موضر ولا خاطفينو تقول ليهم كيكون مع فلان..هاد الدري الصغار مشكلة كتكون محترم وكلشي كيوقرك ويمشي كلشي هادشي كلوا… علاش ..برهوش منوض الصداع تحت الشرجم كتجري عليه كيرد الهدرة كضرب ليه راسو مع الحيط كيجي باه كثر منو..ممربيش كتوليو دراري..

الصداع ديما مكندخلش ليه ..غير كتجي فشكل مني كتوقف عليا مرةوختها..علاش.. لحقاش بوطت شي حاجة دايزة من حدايا..ديك الحاجة كتكون دري قلق ليا الراحة..لمرا كتجي وتغوت "تعديتي ليا على ولدي " "باه قبيح وخوتي مكيتفاهموش" وختها المثقفة كتبدا تفلسف وتعبر "خويا مكانش خصك دير راسك فدري صغير راك بعقلك.."يعني بالعربية أنا برهوش داير عقلي فولد ختها..كنبغي غير ندوي كيجي شي جار لابس فوقية داير فيها مول لعقل كيجر فيا ويقول ليا متغاوتش مع لعيالات هتشوه راسك..نسا أنو دار شوهة مني جرني قدام الشعب.

فالمقابل كاين للي مربي ولادو تبارك الله..كيسمعوا الهدرة..واحد لمرة دقيت على دار غير نسول على ولد جيرانا صغير واش عندهم..خرج ليا واحد السيد وحداه ولدوا صغيور..قلت ليه نتا بات فلان..هو يشتف على الدري "اه انا باه أش دار المسخوط"

وكاين دراري صغار كدوز حداهم..باركين قدام باب دارهم والبرائة متبان فيهم..هادوك مشي دراري هادوك مسجلات..كيسجلوا لماماهم خبار الدرب.. كيعاود لماماه كلشي..ولد دربنا جاو عندو صحابو أول مرة..سولوا على دارهم واحد دري صغيور..هو يقول ليهم "عرفتو واحد قاري بزاف كيخرج ديما هز كلاسور" الدري قال ليا عاد عرفت منين كتجيني الدقة لفاك قريت مع القيدوم وباقي عاصر .. 

المختصر المفيد عرف أش كتقول قدام الدراري وديما تحاشا تضرب شي حد منهم راهم بحال الجمل كيعقلوا..ايلا ضربتي شي دري من قبل سير من دابا شري ليه مسكة ووقف معاه فالدرب عنداك تمشي معاه جوج خطوات تجيب لراسك الشبهات..انا من جيهتي الدراري الصغار كيشوفوني داخل للدرب كيقولوا سنفروا بحياتكم…غدايد ولعيا  ديال النهار ديما كنخويها بدقة للراس لأقرب واحد منهم…