مراد هو الدري الظريف فدارهم..خوتو كلهم شابعين قوالب من غير خوم للي مسمين عليه ميناو..ولكن ديفو للخايب فيه أنو عزيز عليه جماعة للعيالات كنعاود ليه شي حاجة نلقا الوالدة ديالو فخبارها..ولا شحال من مرة كيطلع ليا الدم..كيصفط ليا دري للدار مني نزل كنلقاه داخل لدارهم نعيط عليه يقولوا ليا راه كيمشط.. كيخرج هاز قفة ..علاش أمراد.. باغيني نمشي معاه للسويقة يتقدا الخضرة لدراهم..ديما جابد ليا الصداع مني كنتلاقا مع الوالدة فالسوق كتقول ليا كتمشي مع مراد للسويقة وعمرك متسخرتي ليا..كيزيد يفقصني مني يدا يتعزل فالبطاطا كنلوح ليه لبطاطا فالميزان يزرب هو كيرجها ويبدا يتفلسف عليا… هادي ديال لفريق هادي ديال معرفت شنو..فالليل كيخرج لينا لكراسى نبركوا قدام دراهم ..مرة مرة كتعيط عليه ختو يشوف لقطة من برنامج بحال سطار اكاديمي ولا حال داكشي..فتفجيرات 16 ماي قال ليه خويا كثر مني لبوليس مني يشدوك هيقولوا فالتلفزة القبض على مراد الشهير بابو عتية وأبو كرسي..لحقاش مكيفوتش عتبة باب دارهم..نهار قلنا ليه مراد ضبر على خدمة راك قاري عام فلافاك دفع لشي مطعم ولا مرجان كيقول ليا لا كيخدموا غير الدريات فلاكيس.. الدري متفائل حساب ليه هيحسب لفلوس.. كنقولوا ليه غير دفع  هاد لبلاد عاطية للعروبي والمكلخ ونتا فيك هاد الصفات بجوج..كيكعا ويدخل للكراسى ..نقولوا ليه غير كنشدوا فيك رد للكراسى  كيرد عليا لا الدار كيصبنو عليهم ..وصلات بيه البلادة أني نعاود ليه حاجة  وقعات ليا كيعادوها ليا غدا أنها وقهات لخوه..واحد النهار الجار قال ليه راه كاينة خدمة فسونطر حلوه فدرب عمر سير خدم تما راه كنعرف مولاه..قلت ليه مبروك التحرك وخا محال تصبر..دابا مراد كيفيق مع 6 صباح ويرجع فالثمانية للدار والتسعود  يخرج يوقف مع الدراري ويجمع معاهم.. عاودو ليا أنو عرف شي وحدة من غير ماماه وخواتاتو كيخرج معاها وكيبركوا فقهوة بحال الناس..تبارك الله باغي المعقول..وخا باقي فيه نبازات بحال كيشري دانونو وياكلوا بوحدوا فالدار ولا يقول لماماه طيبي ليا هاد الكفتة وخلي نصها فالثلاجة..

مني مراد رجع يفيق بكري ويتزاحم ويشوف الناس ويخرج عينيه كلشي يمكن ليه يخدم غير قلب وبدا وتولف.. وخا الولف صعيب ونتا مصيبة