زكرياء للي كتبت عليه أخر مرة ..قالوا ليا بزاف علاش كتقول ليه زكا لحيوان والدري باينة عليه ظريف…أول مرة مشات عليه هاد الكلمة مني كان مربي بيتبول ..كان مهلي فيها ديما ولكن جا الصيف لقا راسو ممسافرش فكر ادير تبزنيسة.. مبغاش يخدم فالقريعة لقا حل فيه الفلوس..علاش متولدش ليه الكلبة ويبيع ليها لولاد بالدات هاد الماركة من لكلاب مطلوبين من ولاد السيكتور ومن الشفارة للي كيبغي يعيق بيهم حدا ليسيات..ولكن خصو كلب لتلاقح الحضارات.. قلنا ليه علاش متمشي عند واحد لوين كيربي لكلاب فلاكاب وخلي عندو هادي للي مربيها ومن بعد خلصوا..زكا قال لينا لا ..نخاف تمرض ولا يعطيها شي حاجة خايبة ولا تولد ليا مجحوم.. الحل فنظر زكرياء يشري بيتبول خاص بيه مزيان ..وعندو دفتر صحي وخا زكا براسو معندوش..عيينا معاه ..زكا ارخص كلب كيسوا 3000 درهم قال لينا لا هنضبر..زكا تسلف من هدا وكال هادي وشفر هادو.. مهم جمع لفلوس ومشا نهار الاحد للقريعة يشري شي بيتبول..مشا بوحدوا باش مني يدخل علينا للدرب نشوفوه جايب معاه الوحش..كنعرفوا أن لبيتبول الخاصية للي فيه ان المنظر ديالو كيحشم بال منشرح..ولكن زكا مني كان كيقلب لكلاب شاف ليهم الودينين وش واقفين قلبهم يمكن فيهم التونية ملقا والو.. صافي شرا الكلب وجاي بيه.. داخل علينا للدرب وفرحان..الكلب زوين ولكن حاجة مشي تالهيه فهاد الكلب معرفتهاش.. واحد الوقت دايز كاليميرو ولد لعساس.. سول زكرياء واش ذكر ولا نتوة.. عاد عرفت علاش الكل فشكل.. شرا كلب ذكر ولكن بلا بطاريات..الدرب كلو تهز بالضحك على زكا..مشينا معاه للقريعة لقينا هداك للي باع ليه لكلب مكاينش..المهم سيمانة وزكا مكيخرج من الدار جاه اكتئاب والكلب معرفش أش يدير بيه..قلت ليه بيعو لسلطان لعفن يديرو للناس صوصيط جاتو لبكية..كلشي كيفكر أش نديرو للدري قبل ميتصطا ..كنتجمعوا نفكرا حل للقضية..واحد السيد الله يعمرها دار خدام فمارشي سونطرال قال ليه كاينة يهودية كتعطف على الحيوانات عاود ليها على زكا قالت ليه "جيب ليا زكا لحيوان نشري عندو لكلب.". من تما مشات عليه السمية ..زكا متبقاش دير فيها عايق..تواضع وسمع النصيحة ..